من خلال بوست على الفيس بوك
شقيق إحدى الضحايا :الفرامل فصلت فجأة و "ريحة الشياط" أربكت السائق والطلبة
كشف حسن هيكل شقيق الطالبة دينا هيكل، التي أصيبت في حادث أتوبيس طريق الجلالة، الذي وقع أول أمس الإثنين، راح ضحيتها 12 طالبًا، وأصيب 39 آخرين، السبب الحقيقي وراء الحادث، من خلال شهادة شقيقته عقب شفائها.
وأوضح «حسن» عبر صفحته الرسمية على موقع التواصل الاجتماعي «فيس بوك» قائلا: «بحمد الله على نجاة شقيقتي من الحادث، بعد أن جلست بالمستشفى أكتر من 22 ساعة، وعادت للمنزل مرة أخرى، وهي الآن على ما يرام».
وأضاف: «علشان أبرئ ذمتي من ربنا.. كل المسؤولين بيحاولوا يشيّلوا السواق الموضوع علشان يحافظوا على مناصبهم، من خلال كلام أختي السواق كان طبيعي جدًا ومكنش ماشي بسرعة جنونية اللي بيقولوا عليها.. كل اللي حصل إنهم وهم في الطريق شموا ريحة شياط في الباص، ولما حاولوا يقولوا للسواق السواق كان بينكر علشان ميسببش حالة ذعر بينهم».
وتابع: «لما السواق حاول يدوس فرامل علشان يعرف يدخل الملف، الفرامل فصلت منه، وكان قدامه حل من اتنين ياما مش هيعرف ياخد الملف بالسرعة دي ويقع من على الجبل، أو إنه يقلب الأتوبيس على الجنب التاني علشان ميقعوش.. وده اللي حصل».
اللحظات الاخيرة قبل الحادث
وتابع شقيق طالبة جامعة الجلالة المصابة: "قبل ما يقلب الباص نده على كل اللي في الباص، وقالهم امسكوا كويس علشان هنقلب الباص على الجنب البعيد عن الجبل، وكان لازم الموضوع ده يتحكي بالتفصيل لأنها كل ما تحصل حادثة السواق هو اللي بيشيل الليلة والمسؤولين يعملوا نفسهم برا الموضوع، وخصوصًا بعد خبر إن السواق كان بيتعاطى مخدرات، لكن السواق كان في حالة طبيعية، وكلنا عارفين إن في أنواع من الأدوية بتظهر في التحليل إنها مخدرات وهي مش مخدرات".
كان النائب العام المستشار محمد شوقي، قد أمر بتشكيل فريق تحقيق برئاسة المستشار المحامي العام الأول لنيابة السويس الكلية، لمباشرة إجراءات التحقيق في حادث انقلاب حافلة ركاب بطريق الجلالة.
وكانت النيابة العامة قد تلقت أول أمس الاثنين الموافق الرابع عشر من شهر أكتوبر الجاري إخطارًا بوقوع حادث انقلاب حافلة ركاب، مما أسفر عن وفاة اثني عشر طالبًا، وإصابة تسعة وعشرين آخرين.
