توعد بمقاضاة مرتضي منصور
خالد يوسف يتنصل من صداقة عمر زهران ويؤكد.. كان«شغال معانا» مش صديقنا!
أعلن المخرج خالد يوسف عن تقدمه ببلاغات ضد الأشخاص الذين أساءوا له ولزوجته في قضية عمر زهران.
وقال في فيديو بثه عبر صفحته على موقع الفيسبوك:على الرغم كل ما قيل، آثرت أن أصمت تماما، ويحكم القضاء ويقول كلمته في النهاية، فيه قضاء وفيه بوليس، معملناش حاجة خطأ، أننا اتسرقنا، وتوجهنا للبوليس واتاخدت أقوال زوجتي وأقوالي، وقدم المتهم للمحاكمة
وتابع خالد يوسف :فيه ناس بتقول إيه السرعة الفظيعة دي في إصدار الحكم، يا جماعة الناس مش فاهمة أن المتهم اللي بيجدد له الحبس في أربع أيام ثم خمسة عشر يوم، بتنزل جلسات له سريعا، ليه؟ لأنه ممكن يطلع برئ، بجانب إنها قضية رأي عام، فده بيخلي النيابة تسرع في الإجراءات زي قضية ابتزاز ابنة شيرين عبدالوهاب.
وأضاف : هو طلب استئناف، والنيابة حددت له استئناف بعد أسبوعين، وده في مصلحته، ثم السؤال ذنبي أنا إيه في كل الهجوم ده؟ مش ذنبنا أنا وزوجتي خالص، دي اجراءات طبيعية جدا واسألوا أي محامي هيؤكد هذا الكلام.
واستطرد خالد يوسف : اللي بينتقد سرعة المحاكمة بيشكك في أجهزة الدولة، وأنا في النهاية أثق في القضاء ونزاهته.
وأردف: في النهاية، كل الاتهامات التي طالتني أنا وزوجتي سواء من مرتضى منصور أو من ناس آخرين، أنا هاخد حقي بالقانون.
وتابع المخرج خالد يوسف : فجأة أديرت حملة ضدنا، وكأننا من ارتكبنا الجريمة، فإحنا مجني علينا، واحتكمنا للقانون، وفوجئنا بحملة شديدة الإجرام، واتهامات لنا رهيبة، توجهت للقضاء وتقدمت ببلاغات ضد من اتهموني وأساءوا لي، ومن انهاردة مش هسكت، اللي عايز يقول أي حاجة، يتفضل يقول ولنا لقاء في ساحة القضاء.
الشك فى عمر زهران
واستطرد المخرج خالد يوسف: زوجتي عاشت فترة في جدة، وشقتها في الفورسيزونز كانت مقفولة، اتنين معاهم المفاتيح عمر زهران والمحاسب بتاعها مصطفى، وعمر اشتغل معاها عشر سنين وكان مسؤول عن عقاراتها في مصر ويشرف على تنظيم ديكورات أو فرش جديد، ودايما كان كل الناس فاهمة إن صديقنا، مش شغال معانا.
وتابع: لما اتسرقت المجوهرات، تم حفظ القضية في البداية، زوجتي حاولت فتح القضية من جديد، عمر زهران كان بيحاول إقناعها بعدم فتح القضية من جديد، وقال لها تعالي ندور في الشقة جايز نلاقيها من جديد، وزوجتي شعرت بتوتره، وبدأت تشك فيه.
وأوضح خالد يوسف: بدأ يدور مع واحد اسمه عنتر، ومع كل بحث في الشقة، كانوا بيلاقوا جزء من المجوهرات، لمدة خمس مرات، ووفقا لأقوال عنتر، قال كنت بدور بالساعة والساعتين، وعمر يقول لي، دور في الحتة دي فألاقي جزء من المسروقات.
وتابع خالد يوسف في الفيديو: لما صدر قرار ضبط واحضار لعمر زهران، فتشوا الشقة وجدوا شنطة عليها رسمة الموناليزا، وقالهم شاليمار مديهالي هدية، فلما حققوا مع شاليمار أنكرت أنها مديهاله هدية، فهي بتعتز بالشنطة دي جدا، ولما فتحوا الشنطة لاقوا إكسسوارات كتير وفيها ألماظ ودهب وفضة، وعمر زهران قال إنها مدهيالي هدية.
وأضاف: النيابة حولت الشنطة إلى هيئة الدمغة والموازين لبيان فيها إكسسوارات عادية ولا فيها ذهب، وتقرير أثبت صحة كلام شاليمار، النيابة اتهمت عمر زهران وأن فيه دليل، بجانب أن عنتر شهد ضده، وأن أقوال عمر زهران كانت عارية عن الصحة.
وقضت محكمة الجيزة بحبس المخرج عمر زهران، عامين مع الشغل، بتهمة سرقة مجوهرات شاليمار الشربتلي زوجة المخرج خالد يوسف، وبراءة المتهم الثاني.
كشف أمر الإحالة في قضية المخرج عمر زهران رقم 7493 لسنة 2023 جنح الجيزة، عن أنه متهم بسرقة مجوهرات زوجة المخرج خالد يوسف ، بالاشتراك مع خادمة.
