أم صابرين تسأل عن صحة الجامعة العربية
اعتدت الجلوس على مقهى أم صابرين.. وهو مقهى شعبي يقع بجوار المنطقة التي أسكن بها.
أفضل الجلوس على ذلك المقهى لأن رواده لا ينتمون لطبقة المثقفين، أو أصحاب الياقات البيضاء، فغالبية الرواد من أصحاب المخابز والمطاعم والمحلات وعمال وسائقين وموظفين من محدودي الدخل وأخرين على المعاش.
ومن مميزات مقهى أم صابرين أن الرواد إما يلعبون الطاولة أو الدومينو، وخلال مبارياتهم تسمع النكات والقفشات التي تجعلك تضحك رغم أحزانك وهمومك.. وكذلك هم يروحون عن مشاكلهم بجلسات تنسيهم قسوة الحكومة.. لذلك تذهب حكاياتهم للماضي.
لفت انتباهي مساء الثلاثاء الموافق أول أكتوبر 2024 أنهم جالسون أمام التليفزيون كما يجلسون لمتابعة مباريات النادي الأهلي.
سألت مالهم قاعدين كده .. هل يلعب الأهلي اليوم؟
صواريخ إيران
أم صابرين: لأ .. دول بيتفرجوا على صواريخ إيران.. عقبال أملتك كده إيران ضربت 300 صاروخ على إسرائيل بس على الله ميطلعوش زي المرة اللي فاتت.
طلبت قهوتي وجلست أتابع الأخبار عبر الهاتف .. وفجأة قلت كويس أخيراً
سألتني أم صابرين : إيه هو اللي كويس .. نتنياهو مات في الغارة دي ؟
قلت لها : لأ .. رئيس مجلس الوزراء العراقي طلب عقد اجتماع طارئ للجامعة العربية.
أم صابرين: ياه .. ياه .. هي لسه موجودة .. ياراجل أنا افتكرتهم ماتوا مع حسن نصر الله مش هما أللي كانوا معاه في الاجتماع؟
قلت لها : لأ يا أم صابرين أنتي بتخلطي .. حسن نصر الله كان مجتمع مع زمايله في الحزب.. أما الجامعة العربية دي حاجة تانية....
قاطعتني أم صابرين: يا خويا عارفه .. أنا كنت بهزر معاك .. أصل من ساعة حماس والفلسطينيين ما دخلوا في الحرب مسمعناش عن الجامعة العربية فقلت جايز مدتهم خلصت ولغوها.
لحظة صمت أخذت رشفة من القهوة وولعت سيجارة.
أم صابرين: بقولك .. هي لسه الجامعة العربية موجودة في ميدان التحرير واللا باعوها؟
ضحكت وقلت لها يبيعوها إزاي.. موجودة وبخير.
أم صابرين: قلت جايز باعوها أصل موقعها حلو...
قلت لها: يبيعوها إزاي..
في هذه اللحظة دخل الأستاذ أبو إسلام وهو مدرس إبتدائي بالمعاش ألقى علينا التحية وجلس وسأل أيه هي اللي ميقدروش يبيعوها؟
الجامعة العربية
قلت أم صابرين كانت بتسأل عن الجامعة العربية..
قاطعني أبو إسلام : لأ نقدر نعزلهم ونبيعها لأن المبنى ملك محافظة القاهرة ومؤجر للجامعة بإيجار رمزي.. بعدين هي بتعمل حاجة كل شغلها قمم واجتماعات تطلع بيانات حافظينها تبدأ بالإدانة والشجب والتنديد والتحذير ، وتنتهي بطلب المجتمع الدولي.. بس
أم صابرين: طيب والناس اللي بتقتلهم إسرائيل في غزة بالصواريخ والدبابات وجعانيين عشان مش راضية تدخلهم أكل وميه ودوا.. وهم دخلوا على لبنان.
أبو إسلام: أحسن ميدخلوش ..
سألته: ليه؟
أبو إسلام : وده سؤال تسأله.. لما بيدخلوا بتعمر .. أنت ناسي إنهم سبب احتلال أمريكا للعراق وقطر والسعودية والبحرين والكويت والإمارات.. ساعة لما طلبوا منهم التدخل لإنهاء الغزو العراقي للكويت، ودي كانت غلطة كبيرة من غلطات صدام حسين ومن بعديها بنوا قواعدهم وقعدوا ، يعني احتلال مقنع .. وكمان في سوريا ليهم قاعدة وليهم في الأردن غير القاعدة البريطانية..
بعدين كمان ساعة المظاهرات الليبية مش الجامعة دي اللي أدت شرعية لفرنسا وإيطاليا وإنجلترا وأمريكا للتدخل وكمان أدخلت تركيا واتفرج على ليبيا واللي فيها.. يا خسارة
أنت واخد بالك إنه الدولتين دول العراق وليبيا كانوا مصدر شغل ورزق لملايين المصريين وكانوا فاتحين بيوت.
بالله عليك يا أستاذ قول يارب ميدخلو.. دخلتهم وحشة ومش عارفين هيجيبوا مين المرة دي.
روسيا والصين وكوريا الشمالية
ضحكت وقلت روسيا والصين وكوريا الشمالية..
أبو إسلام .. روسيا لها قاعدة في سوريا ومنتشرة في ليبيا وإفريقيا.. وتركيا لها قاعدة في جزيرة سواكن بالبحر الأحمر في السودان ولها قواعد في الصومال وداخلة في إفريقيا، ومشاركة في تخريب ليبيا بمليشاتها تماما مثل سوريا.. أما الصين فدي احتلال اقتصادي مش عسكري ومفيش منها خطر لأنها تدعم التنمية وتوفر فرص عمل ..
صمت أبو إسلام لحظات وتنهد ثم قال : يا عيني علينا مش عارفين نلاقيها منين واللا منين من الحكومة واللا من اللي حولينا كانت ناقصة أثيوبيا واللي بيحصل في السودان.
لحظة صمت .. بعدها قال أبو إسلام : بالله عليك تسكت وتوجعنا وكفاية اللي احنا فيه وتعالى نلعب عشرة طاولة..
أم صابرين: بس أنا كنت بسأل يعني الناس اللي في الجامعة العربية كويسين وصحتهم كويسة؟
أبو إسلام: ماتخفيش عليهم خافي على روحك صحتهم بمب .. لأ صواريخ.. وبيعملوا مهرجانات وزي الإف ٣٥.
قوم نلعب واللا أنت خايف لتضيع عليك العشرة زي السوبر الإفريقي.
